مش كل يوم لازم تكسب… المهم ما تخسرش نفسك

✍️ : د. كريم ابوعيش

فيه أيام تصحى فيها حاسس إن الدنيا واقفة قصادك، مش معاك. كل حاجة ماشية تقيلة، والوشوش قليلة، والصوت عالي من غير نتيجة. تحاول تمشي اليوم على مهلك، بس تحس إنك بتجري في زحمة ومش واصل لحاجة. أيام شبه دي كتير، ومش عيب نعترف إنها بتعدّي علينا كلنا.

إحنا اتعودنا نقيس اليوم بالنتيجة: عملت إيه؟ كسبت كام؟ اتقدّرت ولا لأ؟ ولو الإجابة ما طلعتش مُرضية، نبتدي نحاسب نفسنا بقسوة. ننسى إن في أيام ما فيهاش مكاسب واضحة، لكنها بتعدّي من غير خسائر جوّه الروح، وده في حد ذاته مكسب كبير.

فيه أيام ما بتضيفش لحياتك حاجة جديدة، لكنها ما تسحبش منك حاجة قديمة. ما تغيّرش مبادئك، ما تكسّرش خاطر حد، وما تتنازلش عن نفسك علشان تمشي الدنيا. النوع ده من الأيام شكله عادي، بس تأثيره عميق، وبيظهر بعدين.

الخسارة الحقيقية مش إنك تقع أو تتأخر، الخسارة إنك تقوم شخص غير اللي كنت عليه. أعصابك سايبة، قلبك مقفول، وكلامك ناشف. إنما اليوم اللي يخلص وإنت لسه طيب، ولسه قادر تفهم وتعدّي، ولسه بتضحك حتى لو على حاجة صغيرة… ده يوم ما راحش هدر.

الدنيا أوقات بتاخد منك حاجات، وأوقات تسيبك من غير حاجة خالص. بس في الحالتين، المهم ما تسيبش نفسك. ما تخرجش من اليوم أقل، ولا أضيق، ولا أشرس. الأيام بتعدّي، لكن اللي بيفضل هو شكلك من جوّه.

علشان كده، مش كل يوم لازم تكسب حاجة جديدة، ولا كل خطوة لازم تبقى واضحة. أحيانًا أكبر إنجاز إنك تعدّي اليوم محافظ على نفسك زي ما هي… من غير كسور، ولا تنازلات، ولا وجع زيادة.

مش كل يوم لازم تكسب…

بس كل يوم مهم ما تخسرش نفسك.

#حديث_الثلاثاء