سلوكك مرايتك : التفاؤل قرار يومي

✍️ : د. كريم ابوعيش

وسط زحمة الأخبار وضغط الأيام وكثرة الخيبات، التفاؤل يبدو رفاهية. كلمة جميلة، لكنها أحيانًا بعيدة عن الواقع.

الحقيقة إن التفاؤل مش إنكار للألم، ولا تمثيل إن الدنيا وردية. التفاؤل هو اختيار واعٍ. اختيار إنك تكمل الطريق حتى وإنت تعبان.

في حياة كل واحد فينا أيام صعبة. نصحى فيها من غير طاقة، من غير حماس، ومن غير سبب واضح يخليك تبتسم. الطبيعي تحس بالضعف. غير الطبيعي إنك تستسلم ليه.

التفاؤل مش إنك تقول “أنا تمام” وإنت مش تمام. التفاؤل إنك تقول: أنا موجوع… بس لسه واقف.

الناس كتير فاكرة إن التفاؤل مرتبط بالحظ أو الظروف. الحقيقة إن التفاؤل سلوك وطريقة تفكير. انعكاس داخلي. في ناس ظروفها صعبة، لكنها شايفة بكرة فرصة. وناس كل حاجة عندها تمام، لكنها شايفة الدنيا مظلمة.

التفاؤل بيبدأ من التفاصيل الصغيرة: شكر بسيط على حاجة عدت بسلام، أمل هادي في يوم أهدى، إيمان إن اللي جاي – حتى لو مش واضح – ممكن يكون أفضل.

مش مطلوب تكون مبتهج طول الوقت، ولا قوي دايمًا. المطلوب بس إنك متقفلش باب الأمل. لأن لما الأمل يتقفل، كل حاجة بعده بتبقى أصعب.

التفاؤل هو إنك تدي لنفسك فرصة جديدة كل يوم، حتى لو الظروف ضدي.

هو إنك تؤمن إن التعب مش دائم، وإن الفرج له توقيت، وإن كل مرحلة مهما طالت ليها نهاية.

التفاؤل مش كلمة نكتبها، ولا شعار نرفعه. التفاؤل سلوك وطريقة مواجهة الحياة.

سلوكك هو مرايتك… والمرايا لا تجامل أحدًا