الإحتواء والإحترام، مشاعر يحتاجها ابنك لحياة متزنة نفسيا

كتب : يوسف عادل 

في وسط زحمة الحياة ، فيه ناس حواليك بتقع من غير ما تقول ، مش لأنهم ضعاف...لكن لأنهم تعبوا من جوّا ، ومش لاقيين اللي يسمعهم . 

عزيزى القارئ . 

الإحتواء والإحترام، مشاعر يحتاجها ابنك او ابنتك أو صديق لك ... الخ  لحياة متزنة نفسيا، فخبراء النفس والتربية، يؤكدون أن ما نواجهه هذه الأيام من نماذج من الشخصيات غير المتزنة، يرجع إلى عقد نفسية تكونت من الطريقة التي تربوا بها، ولإفتقادهم الكثير من المشاعر الهامة في حياة كل إنسان، وأهمها الإحتواء والحنان، وكذلك الإحترام والتقدير، فكل شاب يحتاج الإحتواء والحب والحنان، ليشب محبا لذاته ولحياته، ومن جهة أخرى يحتاج إلى التقدير والإحترام، حتى يشب واثقا من نفسه مقدرا لذاته ولإمكانياته، وبذلك يكون شخصا متزنا نفسيا، سويا على المستوى الشخصي والمجتمعي.

           تعالى معى اشرح لك بطريقة أخرى . 

أمان البيت، اللي المفروض الأب والأم يبقوا فيه مصدر طمأنينة مش مصدر ضغط...!! 

فيه أولاد مشكلتهم مش في مصروف ناقص ، ولا خروج متأخرة، مشكلتهم إن محدّش بيطبطب عليهم.

مش كل مرة الولد يغلط نبدأ نزعق...أوقات نحتاج نقرب ونسأله: "مالك...؟" ونسمع بإخلاص ، مش بس نحكم

الإحتواء مش دلع...ده إنقاذ، ابنك مش دايمًا محتاج تتكلم معاه عن الصح والغلط، أوقات محتاج يحس إنك شايف تعبه ومتفهّمه، وإنك معاه مش عليه.

لكن كمان، لازم تاخد بالك من اللى حواليه...!! 

ابنك مش عايش لوحده ، فيه بيئة حواليه بتأثر فيه كل يوم.

راقب صحابه...شوف مين بيقوّيه ، ومين بيشدّه لتحت.

ما تسيبهوش يتربى في عزلة ، ولا في صحبة ضيعة ،

والبنت كمان...محتاجة رقابة بحنية ، ومتابعة بحكمة.

اسأل، وافهم ، وقرّب...مش لازم تتحكم، لكن لازم تكون حاضر.

أما الصحاب  فالصاحب وقت الضيق بجد.

صاحبك اللي دايمًا بيضحك ممكن يكون أكتر حد محتاج كلمة حقيقية...

اسأل عليه ، اطمن على قلبه ، مش بس على شكله.

مش لازم تبقى واعظ، ولا خبير نفسي...بس كن إنسان ، وكن موجود.

طيب نعمل إيه ... !!  وإزاي نحتوي بعض؟

1 - اسمع قبل ما ترد 

اسمع بقلبك، مش بودانك بس ، اللي قدامك محتاج يطلع اللي جواه قبل ما يسمع نصايح....

2 - ابعد عن المقارنات 

كل بني آدم ليه ظروفه ، فلا تقارنه بحد تاني...المقارنة بتخنق، مش بتحفّز...

3 - اظهر إنك موجود 

رسالة بسيطة ، سؤال صادق ، حضن وقت الزعل...دي حاجات بتمنع انهيارات نفسية...

4 - تقبل الغلط ، لكن ما تسيبش الغلط 

اللي يغلط مش لازم نقطعه ، لكن لازم نرجّعه للطريق بحنية وعقل.

5 - تابع اللي ساكت 

ساعات اللي ساكت بيكون أكتر حد بيحتاجك ، افتح معاه الكلام من غير ما تستناه يطلب.

6 - راقب البيئة 

البيت مش بس أكل وشرب... البيت أمان وتربية وسؤال عن الصحبة والسلوك.

وجودك في حياة ابنك أو بنتك مش رفاهية ، ده أمان نفسي وروحي بيمنع الانهيار قبل ما يبدأ ، الناس مش دايمًا بتنهار من مشاكلها، الناس أوقات بتنهار من وحدتها فيها.

الى كل أب وأم ، وصاحب وأخ ،خليك دايمًا سند ، يمكن وجودك في اللحظة الصح يكون سبب في نجاة حد كان بيغرق.