عايزك تكون عارف إننا كلنا بشر ، يعنى كلنا عندنا مشاكل ، وكلنا فينا عيوب ، وكلنا بنعانى ، و كلنا مليانين كبت وهم ، كلنا بنحزن ونفرح ... حتى لو كان الحزن أكبر ...!!
بنفرح حتى لو كان الفرح أصغر ، وطبعاً بأشكال وألوان ونسب مختلفه من واحد للثاني ، لكن كلنا بشر ، وكتير أوى أوى عدا، لكن مش عدا بالناس ولا بشخص معين ، إنما عدا بستر ربنا ورحمته علينا ، ممكن يعدى عليك موقف أو ظروف معينه أياً كانت وتكون مرعوب ، أو خايف من موقف أو تصرف ، أو مخنوق لظروف ما ، و تلاقى نفسك تنام أو تنامى وتقوم سبحان الله تلاقيها عدت واتحلت بدون أى مجهود خالص ،
فى حين أنك كنت قبل ما تنام دماغك هتنفجر من التفكير ، أنا بس عاوز اقولكم انه كلنا فينا مشاكل ... وفينا عيوب ...وفينا هموم .
ممكن يوم يكون حلو ، ويوم وحش ، وبتعدى وهتعدى ، كلنا بشر ، فخليك لطيف ، خليك خفيف ، خليك هادى ، واتعامل بكل تأنى ، وفكر واهدى وخد قراراتك بكل هدوء وبرود اعصاب ، ومتحاولش تهرب ولا تمشى لإنك هتفضل هربان وخايف طول الوقت ، وهتحس انك إنسان تعيس وخايب وخواف ومهزوم ، فخليك أقوى وواجه كل حاجه بنفسك ، لأن مفيش حد هيجى ويقولك هشيل همك أو نام واستريح انت وانا هاخد الخطوه دى بدل منك ، لأن كل الناس فيها اللى مكفيها ، كل الناس إنسان ..!
انت تقدر يا إنسان ، بس فكر وحاول وحاول تانى وتالت وكتير ، واوعى تقول فشلت ، لأن بداية النجاح الفشل ، خلى عندك صبر وإرادة وعزيمة ومثابرة وإدارة ، أحسن الظن بالله وربنا إن شاء الله هايفكها وهايحلها ، وما كان ربك نسيا،،،
0 تعليقات